Newslaya Home

​प्रतिनिधसभा सदस्य समानुपातिकतर्फको नतिजा सार्वजनिक

शुक्रबार २६, माघ २०७४

काठमाडौं । निर्वाचन आयोगले प्रतिनिधिसभा सदस्य समानुपातिक निर्वाचन प्रणालीतर्फ स्थान प्राप्त गरेका पाँच राजनीतिक दललाई तीन दिनभित्र उम्मेदवारको नामावलीको विवरण पठाउन निर्देशन दिएको छ । समानुपातिक निर्वाचनतर्फ दलले प्राप्त गर्ने स्थान संख्याबारे शुक्रबार औपचारिक रुपमा जानकारी दिँदै आयोगले यसअघि बन्दसूचीमा पेश गरिएको नामलाई समानुपातिक र समावेशिताको आधार मिलाएर यही माघ २९ गतेभित्र पठाउन दलहरुलाई पत्रचार गरेको हो । 
आयोगका अनुसार समानुपातिकतर्फ नेकपा (एमाले) ले ४१, नेपाली कांग्रेसले ४०, नेकपा (माओवादी केन्द्र) ले १७ तथा राष्ट्रिय जनता पार्टी नेपाल र संघीय समाजवादी फोरम नेपालले छ–छ स्थान प्राप्त गरेका छन् ।
प्रतिनिधिसभा सदस्य निर्वाचन प्रणालीतर्फ ४९ दलले बन्दसूची पेश गरेकामा एमाले (३१,७३,४९४), काँग्रेस (३१,२८,३८९) माओवादी केन्द्र (१३,०३,७२१), राजपा (४७२,२५४) र समाजवादी फोरम (४७०,२०१) ले मात्र राष्ट्रिय राजनीतिक दलको मान्यता प्राप्त गर्न आवश्यक कूल सदर मतको न्यूनतम मत सीमा तीन प्रतिशत कटाएका छन् ।
समानुपातिकतर्फ कूल सदर मत ९५ हजार ४४ लाख ७७९ रहेकामा सबैभन्दा बढी एमालेले ३३.२५ प्रतिशत मत प्राप्त गरेको मुख्य निर्वाचन अधिकृत वेगेन्द्र शर्मा पौड्यालले जानकारी दिए । एमाले प्रतिनिधिसभाको प्रत्यक्षतर्फ ८०, समानुपातिकतर्फ ४१ र राष्ट्रियसभा सदस्यमा २७ स्थान जित्न सफल भएको छ ।
समानुपातिकतर्फ सबैभन्दा कम मत ‘हाम्रो पार्टी’ले ४२६ अर्थात् (०.००४५) प्रतिशत मत प्राप्त गरेको छ । तीन प्रतिशतभन्दा कम मत प्राप्त गर्ने दल ४४ छन् । सदर मतमध्ये नौ लाख ९६ हजार ७२० मत खेर गएको थियो । 
समानुपातिक निर्वाचन प्रणालीतर्फ अब एमालेले ३७, कांग्रेसले २०, माओवादी केन्द्रले १६, राजपाले छ र संघीय समाजवादी फोरम नेपालले कम्तीमा पाँच महिलाको प्रतिनिधित्व सुनिश्चित गर्नुपर्ने आयोगले जनाएको छ ।
राष्ट्रियसभा निर्वाचनको नतिजा सार्वजनिक नभई प्रतिनिधिसभा सदस्यको समानुपातिकतर्फको निर्वाचनमा दलले प्राप्त गर्ने स्थान संख्या औपचारिक रुपमा सार्वजनिक गर्न नमिल्ने जनाउँदै आएको आयोगले बिहीबार राष्ट्रियसभाको निर्वाचनको नतिजा आएसँगै शुक्रबार मत परिणाम सार्वजनिक गरेको हो ।
निर्वाचनको नतिजा यही पुस ११ गते नै तयार भए पनि कानूनी अड्चनका कारण आयोगको शुक्रबार बसेको बैठकले समानुपातिकतर्फको नतिजा स्वीकृत गरेको हो ।