काठमाडौँ । इरानमा विद्यालय, कलेज र विश्वविद्यालयमा अध्ययनरत विद्यार्थीलाई विष खुवाएको आरोप एक सयभन्दा बढी सरकारी कर्मचारी पक्राउ परेका छन् । गत वर्ष सेप्टेम्बर १६ मा इरानमा हिजाब विरोधी प्रदर्शन सुरु भएको थियो । यसपछि झण्डै पाँच हजार छात्रा रहस्यमय रुपमा बिरामी परेका थिए ।

विश्वव्यापी दबाबपछि इरान सरकारले घटनाको छानबिन गरायो । विद्यार्थीको पानीमा विष मिसाइएको खुलासा भएपछि उनीहरुलाई पक्राउ गरिएको मिडिया रिपोर्टमा उल्लेख गरिएको छ । 

बालिकालाई विष दिएपछि इरान सरकारको निकै आलोचना भएको थियो । त्यसपछि अनुसन्धान र अहिले पक्राउको प्रक्रिया सुरु भएको छ । सरकारी समाचार एजेन्सी ‘इर्ना’का अनुसार गृह मन्त्रालयले यस विषयमा अनुसन्धान लामो समयसम्म चल्ने स्पष्ट गरेको छ । पक्राउ परेकाहरुलाई सोधपुछ गरी प्रमाण संकलन गरिने छ । अझै केही व्यक्ति पक्राउ पर्न सक्ने सम्भावना छ ।

देशका धेरै सहरबाट मानिसहरु पक्राउ परेका छन् । रिपोर्टका अनुसार पक्राउ पर्नेमा अधिकांश सरकारी कर्मचारी रहेका छन् । केही सञ्चारमाध्यमका अनुसार पक्राउ परेकाहरू सरकार समर्थक र कट्टरपन्थी हुन्।

इरान बाहेक विश्वका धेरै देशमा छात्रालाई विष दिएपछि विरोध प्रदर्शन भएको थियो । विद्यार्थीको आवाज दबाउन यो षड्यन्त्र भएको अभिभावकहरुले बताएका छन् । सर्वोच्च नेता खामेनीले यसलाई अक्षम्य अपराध भनेका छन् ।

गृहमन्त्रालयले पक्राउ परेका बारे खुलेर बोल्न नमानेको छ । देशका धेरै ठाउँमा बालिका विद्यालय पनि बन्द भएका छन् । नोभेम्बरमा कोम शहरमा विषाक्तताको पहिलो घटना रिपोर्ट गरिएको थियो। यहाँ १८ बालिका गम्भीर बिरामी परे ।

षड्यन्त्र भएको आशंका गरिएको थियो किनभने सबै बिरामी केटीहरूले ठ्याक्कै उस्तै लक्षणहरू देखाउँदै थिए । उनीहरुले बान्ता हुनुका साथै हात खुट्टा सुन्निने र सास फेर्न गाह्रो हुने उनको गुनासो गरेका थिए । फेब्रुअरीमा तेहरानको एउटा कलेजका १०० जना युवतीहरूलाई एक साथ अस्पताल भर्ना गर्नुपरेको थियो । यस सम्बन्धमा राष्ट्रसंघमा प्रस्ताव पनि पारित भएको थियो ।

त्यहाँका विद्यालयका छात्राहरूलाई जबरजस्ती अश्लील भिडियो देखाएर धम्की दिइने गरेको एक रिपोर्टमा दाबी गरिएको छ । यी विद्यार्थीहरुलाई सरकार विरोधी आन्दोलनमा सहभागी भए बलात्कृत हुने धम्की दिइएको थियो ।

साउदी अरेबियाको न्यूज वेबसाइट ‘अल अरेबिया’ले बेलायतस्थित न्यूज वेबसाइट ‘इरान वायर’लाई उद्धृत गर्दै छात्राहरुलाई पोर्न देखाएको जानकारी दिएको छ । यो प्रतिवेदनमा इरानको सुरक्षा बलले यो जघन्य कार्य गरिरहेको बताइएको छ ।

यसका लागि कक्षाहरूमा अनिवार्य सत्रहरू गरिँदै आएको प्रतिवेदनमा उल्लेख छ । अर्थात् यसमा छात्राहरु आउन जरुरी छ । सुरक्षा बलहरूले छात्राहरूलाई सरकार विरोधी प्रदर्शनमा भाग लिएमा गम्भीर परिणाम भोग्ने धम्की दिइरहेका छन्। राजधानी तेहरानको जिल्ला ४ र ५ का विद्यालयमा यस्तो कारबाही गरिएको हो ।

रिपोर्टमा यी अश्लील भिडियोहरू बन्दर महशरको शाहिद रिहाने अल नबी स्कूलमा देखाइएको दाबी गरिएको छ । यही विद्यालयमा (अक्टोबरमा) पहिलो पटक सरकार विरोधी नारा लगाइएको थियो ।