विराटनगर । विराटनगरस्थित ग्रिनक्रस हस्पिटलमा एक महिलाको मृत्यु भएपछि सुन गायब भएको घटना सार्वजनीक भएको छ ।
उदयपुरको त्रियुगा नगरपालिका–७ की ४० वर्षीया सविना दनुवार उपचारका लागि अस्पताल भर्ना भएकी थिइन् ।
आइतबार बिहान चिकित्सकले मृत्यु घोषणा गर्नुअघि ईसीजी गर्ने बहानामा पर्दा लगाइयो । त्यही समय उनको कानमा रहेको करिब एक तोला सुनको मुन्द्रा रहस्यमय ढंगले गायब भएको परिवारको आरोप छ ।
आफन्तले सुन हराएको कुरा उठाउँदा अस्पताल प्रशासनले सुरुमा घटना नै अस्वीकार गरेको थियो ।
तर उपचारकै क्रममा खिचिएको भिडियोमा मृतकको कानमा सुन स्पष्ट देखिएको तथा सीसी क्यामेरा फुटेजमा समेत शङ्कास्पद गतिविधि देखिएको बताइएको छ ।
घटनापछि अस्पताल परिसर तनावग्रस्त बनेको थियो । प्रहरी बोलाइएपछि भएको छलफलमा अस्पताल प्रशासनले दोषी कर्मचारीमाथि छानबिन गर्ने भन्दै मृतकका परिवारलाई एक तोला सुन बराबरको रकमको चेक दिएको बताइएको छ ।
अस्पतालका सञ्चालक कृष्ण खवासले घटनाबारे आफूलाई जानकारी नभएको प्रतिक्रिया दिएका छन् । यता मोरङ प्रहरी प्रमुख कवित कटवालले घटनामाथि गम्भीर अनुसन्धान भइरहेको बताएका छन् ।
